قیام الدین کشاف: ځان وژنه حرامه ده


د افغانستان د علماوو شورا اعلان کړی دئ، چي په اسلام کي ځان وژنه حرامه ده. دغي شورا ويلي دي، هغه څوک چي ځانمرگی بريد کوي د جنت مستحق نه دئ او هغه څوک چي د جهاد له پاره ځانمرگی بريد کوي، حرام عمل ترسره کوي.
په انځور کي د افغانستان د علماوو د سرتاسري شورا رئيس مولوي قيام الدين کشاف.
دغي شورا د يوې اعلاميې په خپرولو سره، چي د افغانستان د جمهوري رياست له دفتره رسنيو ته لېږل سوې ده، ويلي دي: «د افغانستان د علماوو شورا له تاسيس راهيسي په وارو وار د انتحاري بريد او ملکي خلکو د وژلو د ناروا والي په خاطر اعلاميې صادري کړي دي او خپل ږغ ئې تر خپلو مسلمانو خلکو او نړيوالو پوري رسولی دئ. دا دئ يووار بیا د دغه بريدونو د حرامېدو په خاطر د قرآني حديثو په روڼا کي دغه مصوبه صادروو.

کابل (پژواک ٩لړم٩١): مشرانو جرګې د افغانستان د علماوو له شورا وغوښتل، چې د ځانمرګو بريدکوونکو او د هغوى د ملاتړو پر وړاندې جهاد اعلان  کړي.د مشرانو جرګې غړيو دغه غوښتنه نن په خپله عمومي غونډه کې وروسته له هغه وکړه، چې  د اختر په لومړۍ ورځ په فارياب ولايت کې د اختر پر لمونځ کوونکو ځانمرګي بريد په اړه د جرګې ځينو غړيو څرګندونې وکړې.

د فارياب په بريد کې، چې تر اوسه يې چا مسووليت پر غاړه نه دى اخيستى ، د يو شمېر  پوځي کسانو په ګډون ٤١ تنه عام وګړي ووژل شول او ٥٦ نور ټپيان شول.

په مشرانو جرګې کې د فارياب استازي سيد فرخ شاه جناب ،چې  له دولتي پلاوي سره يوځاى فارياب  ته تللى و، په نننۍ عمومي غونډه کې وويل ، چې ددې بريد په وژل شويو او ټپيانو کې ښځې او ماشومان هم شامل دي.

جناب وويل، چې حکومت بايد د وسلوالو مخالفينو پر وړاندې خپله تګلاره بدله کړي، ځکه چې دولت وسلوالو مخالفينو ته د سولې بلنه ورکوي، خو هغوى د ځانمرګيو بريدونو او چاودونو له لارې  عامو خلکو ته مرګ ژوبله اړوي .

ده د افغانستان د علماوو له شورا غوښتنه وکړه ، چې د ځانمرګيو بريدکوونکو او د هغوى د ملاتړو  پر وړاندې جهاد اعلان کړي .

په ياده جرګه کې د نورستان استازي حافظ عبدالقيوم هم وويل ، چې ځانمرګي بريدونه  د دولت وسلوال مخالفين کوي او  د علماوو شورا بايد  نور د وسلوالو مخالفينو او ځانمرګيو بريدونو پر وړاندې چوپه خوله پاتې نشي .

ده  د علماوو له شورا وغوښتل ، چې  د ځانمرګيو بريدکوونکيو او د هغوى د ملاتړو  پر وړاندې دې جهاد اعلان کړي او ځانمرګي بريدونه دې حرام  وبولي .

د قيوم په وينا، د اسلام دين هېڅ ډول ځان وژنې ته اجازه نه ورکوي او په هر ډول چې وي بايد ددې کار مخه ونيول شي.

په مشرانو جرګه کې د دايکنډي استازي علي اکبر جمشيدي وويل ، چې ځانمرګى بريد کول يو غير انساني عمل دى .

دى وايي : (( له ټولو خلکو سره دا يوه پوښتنه ده ، چې د علماوو شورا تر اوسه ولې د ځانمرګيو بريدونو پر وړاندې چوپه خوله پاتې ده .))

دى هم وايي، چې د علماوو شورا بايد هر څه ژر د ځانمرګيو بريدکوونکو او د هغوى د ملاتړو  پر وړاندې د جهاد فتوا ورکړي .

د مشرانو جرګې لومړي مرستيال محمد علم ايزديار، چې نننۍ غونډه کې يې تر مشرۍ لاندې جوړه شوې وه ، وويل ، چې د علماوو شورا نور بايد د ځانمرګيو بريدونو پر وړاندې چوپه خوله پاتى نه شي او  ووايي، چې دغه کار حرام او پر وړاندې يې جهاد روا دى .

دى وايي ،چې ديني عالمان بايد خلکو ته لارښوونه وکړي ، ترڅو له ځانمرګيو بريد کوونکو سره هېڅ ډول مرسته ونه کړي .

د هغه په وينا ، له دې امله چې له وسلوالو مخالفينو سره د سولې پروسې  مثبته پايله نه درلوده،  دولت بايد په هېواد کې د امنيت د ټينګښت لپاره بل ميکانېزم غوره کړي .

ده وويل، چې د ځانمرګيو بريدونو په اړه د سعودي عربستان د ستر مفتي څرګندونې د افغانستان د علماوو د شورا لپاره سرمشق کېدلى شي .

د سعودی عربستان ستر مفتي د عرفات په ميدان کې ويلي، چې انتحار او ترور د اسلام پرخلاف ناوړه عملونه دي او هر څوک چې په دغو عملونو لاس پورې کوي هغوی د اسلام دښمنان دي.

د مشرانو جرګې ډيرو غړيو يادې خبرې تاييد کړې او د فارياب بريد يې  په کلکه وغانده .

هڅه مو وکړه ، چې په دې اړه د افغانستان د علماوو شورا نظر واخلو، خو بريالي نه شوو.

خو د افغانستان د علماوو شورا رييس مولوي قيام الدين کشاف ، چې له ولسمشر سره د فارياب  تر بريد وروسته دغه ولايت ته تللى و ، هلته په يوه غونډه کې ياد شوى بريد په کلکه غندلى دى .

هغه ويلي: ” دا په هېواد کې لومړی بريد نه دی، بلکې زموږ د خلکو په ودونو، جنازو، د عاشورا په ورځ دا ډول بريدونه شوي او زموږ مسلمان هېوادوال يې شهيدان کړي دي.”

د دعوت ګوند مشر او پخواني جهادي رهبر عبدالرب رسول سياف د روان کال د وږي په مياشت کې ويلي و، چې ځانمرګى بريد ناروا عمل دى او هېڅ ديني عالم د دا ډول بريد رواوالى نه شي ثابتولى.

د طالبانو وياند ذبيح الله مجاهد د مشرانو جرګې د څرګندونو په اړه څه نه دي ويلي، خو د عربستان د مفتي د څرګندونو په اړه يې ويلي، چې دغه فتوا دوى ته نه ده رسېدلې .

هغه ويلي : ”  داپه دين کی روښانه ده چی ځان وژنه حرامه ده او فدايي بريد، چی د جنت په طلب سره وي روا اوجوازلری.”

Advertisements

۱ څرگندون (+add yours?)

  1. ناپیژنده
    نوومبر 28, 2012 @ 16:42:03

    ؛داپه دين کی روښانه ده چی ځان وژنه حرامه ده او فدايي بريد، چی د جنت په طلب سره وي روا اوجوازلری.؛ په اسلام کې دا خبر چرته ویل شوې؟ الله پاک دا خبر چرته فرمایلې؟ فدايي یعنې څه او ځانه وژنه څه؟

ځواب دلته پرېږدئ

Fill in your details below or click an icon to log in:

WordPress.com Logo

You are commenting using your WordPress.com account. Log Out / بدلون )

Twitter picture

You are commenting using your Twitter account. Log Out / بدلون )

Facebook photo

You are commenting using your Facebook account. Log Out / بدلون )

Google+ photo

You are commenting using your Google+ account. Log Out / بدلون )

Connecting to %s

%d bloggers like this: