خدمتګار: طالبان په تعويذونو خلك جګړې ته استوي


خدمتګار ورځپاڼې پخپله نننۍ ګڼه کې دې موضوع تم شوې چې پاکستان د جګړې لپاره طالبان د تعویذونو په زور استوي.

خدمتګار لیکلي، د افغان ځواكونو له خوا ځينې نيول شوي طالبان وايي چې په پاكستان كې ورته داسې تعويذونه وركړل شوي چې ګويا د جګړې پر مهال افغان ځواكونه تاسې نه شي ليداى.

دوى زياته كړې، په پاكستان كې ورته ويل شوي چې دغه تعويذونه د جګړې پر مهال د ډال كار ور كوي او كه له ځانه سره يې وساتئ بريا مو خپله ده.

د چارو شنونكي وايي چې په پاكستان كې پر جنګېدونكو او ځانمرګو كسانو باندې ډېر كار كېږي او له بېلابېلو لارو هڅه كېږي چې دوى جګړې ته چمتو كړي.
د سياسي او ديني چارو كارپوه محمد حسن حقيار په دې اړه خدمتګار ته وويل چې په پاكستان او افغانستان كې جنګېدونكو كسانو باندې ډېر كار كېږي څو دوى جګړې ته تيار كړي: (( هغسې جګړې ته چې د جنګېدونكو مرګ په کې يقيني وي، له دغسې تكتيكونو كار اخستل كېږي چې ډېر ناكام دي او پخپله د وسله والو طالبانو په زيان دي.))

نوموړى زياتوي چې د افغانستان په جګړه كې له بېلابېلو تكتيكونو كار اخستل كېږي چې نه له اسلامي او نه هم د بشري حقونو له منل شويو موازينو سره اړخ لګوي: (( په جګړه كې د اسلام د مقدس دين اصول او قوانين روښانه دي.))

نوموړي د خپلو خبرو په دوام وويل چې د اسلام مبارك دين امر كوي چې په جګړه كې بې ګناه كسانو، بوډاګانو، ماشومانو او حتى نباتاتو او حيواناتو ته زيان مه رسوئ.

دا په داسې حال كې ده چې د كندهار په پنجوايي ولسوالۍ كې د وسله والو طالبانو يوه نيول شوې نهه كسيزه ډله وايي چې دوى ته په پاكستان كې د تعويذونو د وركړې پر مهال ويل شوي وو چې كه دركړل شوي تعويذونه له ځانه سره وساتئ، نو حتى د مقابل لوري مرمۍ هم تر تاسو نه شي در رسيداى.

د دغو طالبانو له ډلې يوه يې له دويچه ويله المان سره په مركه كې ويلي چې د پاكستان په كوټه، چمن او نورو سيمو كې ورته روزنه ور كړل شوې او بيا د جګړې لپاره افغانستان ته رالېږل شوي: ((په كوټه، چمن او نورو سيمو كې يې د جهاد درسونه راكړل او تعويذونه يې را تر غاړې كړل چې د دې په بركت مو نه څوك په جګړه كې ليداى او نه نيواى شي، له طالبانو سره همكاري وكړئ چې خداى جنتونه در كړي.))

دوى ويلي چې د تعويذونو ترڅنګ په پاكستان كې ورته دا هم ويل شوي وو چې كه بريالۍ جګړه وكړئ، نو موټر به هم دركړو، خو اوس پخپلو كړنو پښېمان يو.
د دغو نيول شوو کسانو په ډله کې محمد طاهر وايي چي ده ته د ماين جوړولو په برخه کې زده کړې ورکړل شوې دي او د ماين جوړولو ترڅنګ په ماين ښخولو کې هم پوره وړتيا لري: ((موږ ته به د تراکتور په واسطه چاودېدونکي مواد له پاکستان څخه راوړل کېدل او دوى به د سړک د غاړې ماينونه ترې جوړول.))

د پنجوايي ولسوالۍ امنيه قوماندان سمونيار سلطان محمد له رسنيو سره د خبرو پرمهال وويل، ياد کسان يې د کره استخباراتي معلوماتو پر بنسټ په پنجوايي ولسوالۍ کې له يو شمېر وسلو، مهماتو او تر سلو زياتو د سړک غاړې ماينونو سره يو ځاى نيولي چې پر خپلو کړنو يې اعتراف هم کړى دى.

د قوماندان په خبره، په دې برياليتوب کې د سيمې خلكو له دوى سره ډېره مرسته کړې ده: ((له دغو طالبانو سره مو يو تن په زخمي حالت کې هم نيولى دى چې اوس په روغتون کې تر درملنې لاندې دى. دغه وسلې، چې تر سلو زيات ماينونه، راکټونه، کلاشنکوفونه او لسګونه کيلو ګرامه چاودېدونکي مواد دي زموږ د پوليسو لاس ته ورغلي دي.))

دغه کسان له وسلو او ماينونو سره په داسې حال کې نيول کيږي، چې په دې وروستيو کې د کندهار او جنوبي حوزې په بېلا بېلو برخو کې د سړک غاړې ماينونو يو شمېر ملکي وګړو ته مرګ ژوبله اړولې ده. د چارواکو په خبره، د پېښو په قربانيانو کې ښځې او کوچنيان هم شامل دي.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / بدلون )

Twitter picture

You are commenting using your Twitter account. Log Out / بدلون )

Facebook photo

You are commenting using your Facebook account. Log Out / بدلون )

Google+ photo

You are commenting using your Google+ account. Log Out / بدلون )

Connecting to %s

%d bloggers like this: