افغان کرکټ په نړۍ کې (۹) خو فټبال (۱۲۷) مقام لري


په افغانستان کي د کرکټ لوبي چټکه وده ددې سبب سوې، چي نړيوالو ته ددغه هيواد ښه انځور وړاندي کړي او د افغان کرکټ  افغان فټبال بهرنيانو هغه منفور افکار تغير کړي، چي ددې هيواد د نوم له اورېدلو سره به يې، په خپلو ذهنونو کي ترسيمول.

د کرکټ لوبي ودي او په دغه ډګر کي د لوبغاړو بې سارو او نه تصور کېدونکو برياوو، نه يوازي په دنيا کي افغانستان کي نيک نامه کړى، بلکه په کور دننه يې هم هغه ولسونه، قومونه او پرګنې سره يو ځاى کړي، چي کلونه کلونه يې د مختلفو مشاکلو او منازعو له خاطره يو بل ته سنګر نيولى و.

د افغانستان د کرکټ فدراسيون (وروسته بورډ سو) په ١٩٩٥ کي رامنځ ته سو چي په ٢٠٠١ زېږديز کال کي يې د کرکټ د نړيوالي شورا ICC د دريمي درجې غړيتوب تر لاسه کړى او بيا دوه کاله وروسته د کرکټ د آسيايي شورا غړى سو.

د کرکټ نړيوالي شورا د درجه بنديو سره سم، د افغانستان کرکټ په نړۍ کي ٩ ځاى لري، چي د بنګلدېش او زيمبابوې په شان هيوادونو څخه چي د کرکټ نړيوالي شورا دايمي غړي دي، هم مخته دى.

د کرکټ نړيوالي شورا د معلوماتو سره سم د افغانستان د کرکټ ټيم هم د طالبانو د حکومت تر سکوت وروسته په ٢٠٠١ کال کي جوړ سو او دغې لوبډلي په يوازي اتو کلونو کي د نړيوالو يو ورځنيو لوبو کولو امتياز تر لاسه کړ.

د افغانستان کرکټ لوبډلي په خپل ډېر لنډ سپورټي مزل کي د يو ورځنيو لوبو د امتياز تر لاسه کولو ترڅنګ د ٢٠١٠ زېږديز کال د فبرورۍ په مياشت کي يو بل امتياز هم تر لاسه کړى او په دې توګه سره مستقيماً د همدې کال د کرکټ نړيوالي شورا د شل اووريزه لوبو په نړيوال جام کي د هند او سويلي افريقا د قوي ټيمونو پر وړاندي ولوبېده.

کرکټ لوبډلي په همدې جام کي د ګډون له برکته د افغانستان ملي سرود په ټوله نړۍ کي په خلکو واورېدى او هم يې ددغه هيواد بيرغ پر ميليونونو سکرينونو نړيوالو ته وښووى.

يادي لوبډلي تر دې جام پوره دوه کاله وروسته په سريلانکا کي کېدونکي د شل اووريزو لوبو بل نړيوال جام ته لاره پيدا کړه او د ٢٠١٢ کال د سپټمبر مياشتي پر ١٩ د هند او د همدې مياشتي پر ٢١ نېټه د انګلستان کرکټ لوبډلو پر وړاندي ولوبېدل.

د افغانستان لوبډلي په خپل لنډ لوبيز ژوند کي د چين په سياليو کي د پاکستان لوبډلي ته ماته ورکړه او داځل يې بيا د سهيلي آسيا د راوړاندي کېدونکو لوبډلو په کپ کي د هندوستان د ١٩ کلنو لوبډلي ته تاريخي ماته ورکړه.

دغي لوبډلي د کرکټ نړيوالي شورا د دوهمي او دريمي درجې هيوادونو د شل اووريزو، يو ورځنيو او ټسټ لوبو اتلولۍ هم ګټلي او اوس هم د ياد سوي کپ دفاعي اتله ده.

افغانستان داځل يوازي دوې لوبي شاته دى، چي د کينيا سره کېدونک دي او ددې لوبو تر ګټلو وروسته به سمدلاسه د ٢٠١٥ کال د يو ورځينو لوبو نړيوال جام ته لار باسي او يو ځل بيا به د نړيوالو سره پوه يوه کتار کي دريږي.

د افغانستان کرکټ ټيم د بېلا بيلو کپونو او اتلوليو د ګټلو ترڅنګ د هند، پاکستان، بنګلدېش، اسټراليا، سويلي افريقا او انګلستان په څېر غښتلو لوبډلو سره هم خورا پياوړي لوبي کړي او د ښه کارکرديګو له امله يې نړيوال شهرت هم ترلاسه کړى دى.

د ٢٠١١ کال د نومبر مياشتي پر ١١ د افغانستان د ښځينه کرکټ ملي لوبډله هم جوړه سوه او ددغه هيواد کرکټ په کور دننه دامهال څه باندي ٢٨٠ زره لوبغاړي لري.

افغانستان کې په ډومېسټیک کرکټ کي د خورا ډېرو برياوو په درلودلو سره وتوانېدى چي سږ کال د کرکټ نړيوالي شورا څخه د دوهمي درجې غړيتوب تر لاسه کړي او په دې توګه له هغو هيوادونو څخه وړاندي ولاړ سي، چي د ښو امکاناتو د درلودلو ترڅنګ يې تر پنځوس او شپېته کاله کرکټ وروسته هم د دوهمي درجې غړيتوب نه دى تر لاسه کړى.

افغانستان دامهال ٣٥ ټرف فېچونه، ٣٨ ميدانونه، ٢٢ د عالي درجې کرکټ روزونکي او ٢١ تنه په لوړه کچه روزل سوي کرکټ امپايران لري.

په کرکټ لوبه کي د افغانستان لاسته راوړني خورا زياتي دي، ددې هيواد د ملي لوبډلي ترڅنګ د ١٩ کلنو څخه د کم عمره لوبغاړو ټيم هم په نيوزيلينډ کي د کرکټ نړيوال جام لوبولى او خورا پياوړي ټيمونه يې د ماتي پر ټغر کښېنولي دي.

د افغانستان د کرکټ لوبي د دومره لويو وياړونو سره سره بيا هم د دولتي دوايرو، رئيسانو، چارواکو او لوړپوړو کړيو او سړيو توجه نه ده جلب کړې، څومره چي د نړۍ په سطحه په ١٢٧ درجه کي ددغه هيواد د فټبال لوبډلي جلب کړې ده.

د افغانستان فټبال لوبډله له ٣٧ کلن ځنډ وروسته په کابل کي د پاکستان پر وړاندي تر کوربتوب او وروسته د سويلي آسيا د فټبال فدراسيون په سياليو کي تر وروستۍ بريا مخکي په نړيواله کچه ١٣٩ ټيم شمېرل کيدى، چي په درجه بنديو او لاسته راوړنو کي په هيڅ صورت د کرکټ لوبډلي سره د پرتلې وړ نه دى.

د افغانستان د کرکټ ټيم دوه ځله د کرکټ په نړيوال شل اووريز جام کي ګډون کړى او د ٢٠١٥ کال د ٥٠ اووريزه لوبو له نړيواله جام يو قدم شاته دى، پداسي حال کي چي د فټبال په نړيوال جام کي د افغانستان د ملي لوبډلي د ګډون کولو تصور کول هم ګناه ده، لا هم چا په فټبال نړيوال جام کي د افغانستان ګډون نه دى پېش بيني کړى او لا يې هم څوک د ګډون کولو خوب نسي ليداى.

د اسټراليا، هند، پاکستان، بنګلدېش، انګلستان او سويلي افريقا چي افغانستان ورسره لوبي کړي د کرکټ نړۍ مغروري او مخوري لوبډلي دي، څنګه چي په فټبال کي برازيل، هالنډ، فرانسه، جرمني، انګلستان او اسپانيا دي.

په دې کې شک نشته چې افغان فټبالران دستایلو وړدي ،ځو ولي افغان ولسمشر او دهیواد نور لوړرتبه چارواکي‌زموږ دهیواد کرکټ ته داسي پاملرنه نه کوي لکه فټبال ته چې وشوه ؟

پلټنه او راپور : خبریال ډاټ کام اداره

http://www.khabarial.info/archives/95356

Advertisements

ځوانيمرګه غزاله جاويد – دمخالفو او مينوالو له نظره


غزاله لا دخپلې ځوانۍ شلم پسرلي نه وو بشپړ کړې چې دښایست او ښکلا دښمنانو یې په نرم او سپین وجود باندې دتور ټوپک ګولۍ و ورولې.

د معمول نه خلاف په دغه شپه دملګرو سره مو بنډار وو چې نژدې دشپې څه کم ۱۲ بجې دپاکستان جیو تلوزیون کې دغزلې دمرګ بیړني خبر خپور شوو خو ډيرجزیات ورسره نه وو ماهم انټرنیټ راواخیستو او په ویب پآڼو کې مې دغزلې دمړینې خبر لیدو خو یوازې مې په خبریال ویب پآڼه کې بیاموند چې له دې سره هم ډير جزیات نه وو خو شپه وو تیره شوه سهارهم وختي مې ویب پآڼې ولیدلې او زیات جزیات مې ترلاسه کړو چا یې پړه په وسلوالو اچولې وه او چا یې په پخواني میړه جهانګیر خان باندې.

مابه چې انټرنیټ کتلو هرې خواته به دغزلې دژوند او مړینې تصویرونه اچول شوې وو چې خدای شته ډير راته زړه در دونکي بریښیدل، که څه هم چې زه دغزاله جاوید دغزلو دومره مینوال هم نه وم خو د غزلې دحسن دښکلاء څخه هم نشوم منکریدای.

په کوزه پښتونخواکې خو ځينو لیکوالو او دغزالې د دیرې او ډنډې ملګرو یې ویډیوګانې هم خپرې کړې وی چې لیدل یې زما تر وسې پورته خبره ده، زه نه یوازې دغزلې دمړینې ویډیوګانې نشم لیدالای بلکې د رباني، مسعود، ملا دادالله او صدام حسین ویډیوګانې هم نشم لیدلای بس دامې نازک او ویرجن طبیعت دی.

خو دغزالې مړینې له ځان سره په فیس بوک  او په ویب پآڼو کې بېلابېل غبرګونونو له ځان سره درلودل خو ډيری اکثریت ځوانان،پښتانه، مسلمانان او ددې مینوال پرې خفه وو خو دګوتو په شمېر خلکو داسې کمینټونه ورکول چې اسلام مبارک دین څخه ناسمې پوهې له امله به یې پداسې حال کې دځان پرته ورته بل څوک مسلمان هم نه ښکاري ویل به یې چې دغزلې په مړینه مه خفه کیږي ښه شوه چې مرداره شوه او…..

کله چې کور ته راغلم نو خدای شته چې دغزالې مړینې  او ددغه داسلام دین څخه د ناپوهو لیکوالو نظرونو راباندې غم ساعت په ساعت زیاتیدو او پړ مخه پروت وم له ځان سره مې فکرونه کول دپښتون قوم باندې تپل شوې جنګونه، دپښتون قوم نا داني او بیا دپښتون لخوا دپښتون د ټکولو ویرونه وول چې زه یې ارام ته نه پریښودم او دغزالې مړینې خو به دغه لنډۍ راپایدوله او ان دشپې په خوب کې مې هم له ځان سره زمزمه کوله


اول مې فکر درته نه وو

اوس مې دزړه سترګې کږي درپسې دینه.

او یاهم

دپښتنو په وطن مینه کوي

هیڅ نه ویریږي له ټوپکه جلۍ

ما دشپې ډير تلویزینونو ولیدل خو د ژوندون تلویزیون پرته مې په نورو پښتنو تلویزیونو کې دغزلې په اړ مې کوم پروګرام ونه لیدو یوازې له ژوندون سره پاتې شوم او هغه هم دغزالې وروستۍ او اخري کنسرت چې د کوچني اختر شپې لپاره په ژوندن کې ۵ شپې دمخه ثبت شوې وو

ماته ډيره په زړه پورې داوو چې نن غزله خاورو ته سپاري خو ددې دخولې که ژوند  ورسره یاري وکړي خپلو پښتنو ته به دخفګانونو پرځای خوشحالوونکي نوې نوې سندرې وایي………………….؟

غزالې د روژې په اړه ویل چې پیښور کې روژه سخته یې خو زه دلمانځه پر وخت لمونځ کوم او نوره روژه په خوب تیروم دغو خبرو راته دهغو پښتنو لیکوالو کمینڼونه را یاد کړل چې غزاله یې کافره بوله.

زه ددغه اسلام ټیکه دارانو ته وایم چې  په اسلام کې زنا کول، غیبت کول،شراب ځښل،دمسلمان زړه ازارول، قتل کول او ناحقه مسلمان وژل ټول ناوړه عملونه او کبیره ګناهونه دي او موسیقي او سندرې خو ددې څخه په ښکته کچه دی چې منکراتو ته شاید ورسیږي او کنه نه ملایانو نو قاضی حسن حقیار خو یې درسر داسې نه مني لکه تاسو یې چې وایي..

په هرصورت که موږ داسې فرض کړو چې غزالې سندرې ویلې، نڅاء یې کوله او……………….کول نو اوس پوښتنه داده که یو مسلمان دا کارونه وکړي نو په دغو عملونه کافرشو؟؟؟ ایا په اسلام کې ددې د وژنې حکم شته؟؟ او یا په بل کوم اسماني دین کې یې وژل وراء دي؟؟؟

نه ملا صاحبان به یې هیڅکه هم ثابته نه کړي او موږ هم داسمان نه یو را غورځيدلي اسلام کې پيدا شوې یو، اسلام مو لوستې دی او اسلام مو دژوند طریقه ده خو دملا په څير نه چې داسلام نه یې چاړه جوړه کړې خپله پرې خربوزې خوري او موږ ته یې په خیټه رامنډي.

په اسلام کې هرڅه معلوم دی ( الحلال بین والحرام بین) نو ملاصاحب ته اړتیا نشته چې له ځانه فتوا ورکړي. په اسلام کې د یوکس ژوند اخیستل او په هغې پریکړه کول دمحاکمو او حکومت واک دی نه دکوم  اخوند او ملاء…

دغزاله د خپل پلار سره یوځای په ډيره مظلومیت کې د وسلوالو لخوا مړه شوه چې د اسلام له نظره دیوکس مړینه په ناروا سره دبل چا لخوا چې د ژونې حق یې پرې نه لري پدې صورت کې دغه مړینه شهادت دی او دغه مسله په اسلام کې ثابته ده. دغزلې اعمال، سندرې  او کړنې هم دالله پورې اړه لري او مهربان خدای خپل حق بنده ته بخلي شي خو دبل بنده حق چاته نشي بخلای او دغزالې معامله او حساب هم دالله سره ده نه دکوم بل چا سره خو مرګ یې مظلومیت او شهادت دی.

ما له ډيرو خلکو وپوښتل داسې څوک مې پيدا نه کړل چې په غزله دی خفه نه وي خو د اسامه په مرګ مې هم  ډير پوښتلي وو خو داسې څوک نه وو چې پرې خفه وي!

دغه لیکنه دغزالې په هغه  مرکې ختموم چې ژوندون تلویزیون کې یې کوربه ته دښکلا په اړه ویلي وو چې ښکلاء ژر ختمیږي خو اواز تر ډيره پاتې کیږي.

پښتنوکه غزله له لاسه ورکړه خو دغزلې خوږ غږ او مظلومیت به یې تر ډيره په زړونو او فکرونو کې پاتي وي.                               ( روح یې ښاد ا ویاد یې تل)

رحیم ګل صالح

غیرت داسې وي؟


سړی له عمره پوخ و او داسې ښکاريده چې د ژوند بيړۍ يې له څلويښتو كلونو ډېر مزل كړی،له څېرې وارخطا مالومېده او شېبه پر شېبه به يې دروازي ته وركتل،د كلينک په انګړ كې څو نور كسان هم ناست ول او د انتظار شېبې يې شمارلې،سړي به كله ساعت ته او كله دروازې ته سترګې ور واړولې،نا ارامه مالوميدو،زه يې خواته ناست وم،ترې ومې پوښتل ولې ورخطا يې؟

لږه شېبه يې زما خبري ته پام نه و، بيا يې وروسته په دويم ځل پوښتنې سره خوله په خبرو راغله،

د يكې يوې مشرې اينګور مې د زيږون وخت را رسيدلى،

بېا غلی شو ،پوښتني مې ترې شروع کړې،

نور زامن دې نشته؟

سړي وويل: نه!نورې مې ټولې لوڼه دي.

مكتب وايې؟

سړي برګ برګ را وكتل وېې ويل:

اوس ځان وشرموم، اخیر د پښتو وطن دی، خلک به څه وايې چې په لوڼو سبق وايې،

ځان بې غيرته كولای نشم،تربوران لرم،هغه به بیا ګډې وډې کېسې کوي.

نو اينګور دې ولې كلينک ته راوړې؟

زما خوښه نه وه، زړه مې درزېږې چې دلته خداى مه كړه دلته څه پرې ونشې؟خو،زوی مې سهار هم له عربو راته ټيليفون كړی و، چې مېرمن مې ډاكټرې ته يوسئ،

سړی لږه شېبه غلی وو،شاوخوا ېې وکتل، بيا ېې خبرې شروع کړې

را مې وړه…. خو زما خوښه نه وه، هسې د زوى مې ومنل،زمونږ وخت كې به چې د چا كره ماشوم پيدا كېده، نو د كلي يوه زړه ښځه به ورسره وه،دومره غمونه يې نه و،بس يا به د مور وخت پوره و، يا د ماشوم ،د خداى چارې وي،مونږ پكې دومره ګوتې نه وهلې،

سړی لا په خبرو اخته و، چې دروازه خلاصه شوه، يوه عمر خوړلې ښځه ترې راووته او سړی په بيړه ورپاڅېد،

شېبه وروسته يې تندى وغوړېد، او په خوشالي را روان شو،لمسى يې پيدا شوى و،ويل يې د اينګور حالت مې نازك و، او ډېره وينه يې ضايع شوي وه، خو د ډاكټرې په هڅو يې صحت اوس د ډاډ وړ دی، او ژوند يې وژغورل شو،سړي ورته دعاګانې كولې او له خوشالى په جامو كې نه ځايده،

دا د خوست په یوه لرې پرته ولسوالۍ کې د یو شخصې کلینیک حال و،زمونږ خلک لا هم د جهالت په خوب ویده دي،دوی ځینې داسې کارونه په غیرت پورې تړې چې هغه په اصل کې د بې غیرتی کار وي،دوی فکر کوې چې په خور او لور سبق ویل، بې پښتو کار دی،خو چې سبا مریضه وی نو له هیواده بهر ډاکټر یا ډاکټرې ته ور وستل ورته بې پښتو کار نه بریښې،

که په کور کې مونږ لوستې مور ولرو نو راتلونکې څو نسلونه به ورسره لوستې وي،خو

زیاتره پښتانه دا عادت لرې چې جنګ کول خوند ورکوې،خو له عسکری یې زړه تور دی،سندرې اورېدل خوند ورکوې خو سندرغاړو ته په ښه سترګه نه ګورې او په بیلا بیلو سپکو نومونو ېې یادوې،

په خور او لور تعلیم ورته شرم ښکارې خو بیا بهرنې کلینیک ته  ېې ور وستل هیڅ باک نه ګڼې،

که زمونږه ولس کې لږ شعور را پیدا شې او په کلو بانډو کې د علم شغلې خورې کړي،د زامنو تر څنګ په لور هم تعلیم وکړې نو سبا بیا دې ته مجبور نه شې چې بهرنۍ کس دې زمونږ خویندې میندې وګورې،ولې ېې زما ورور او خور ونه ګورې؟

که زما ورور ډاکټر وي،او میندي خویندي مو ډاکټرې وي،نو هم به له بهرنې ستم خلاص او هم به مو ټولنه  د سلامتی په روانه شې،

خو ولس داسې شوی چې په هر کار کې درته پښتو او اسلام مخې مخې ته کوې،خو په اصل کې به هغه کار په دواړو کې جائز وي،

خو د دوی له جهالته داسې ناجائز پیژندل شوی وي.،

طــالــــبه که جنګیږي، نو بیا نــــــــــــــــــــــــــــــر غوندې وجنګیږه!!! تښته مه!!!


درنو دوستانو پرون نوروز و، د نوى پسرلې رنګينه ورځ،په زياتره سيمو كې ميلې وې، خلكو خوشالې كوله هر چا به ويل كه نن درباندي څه تير شول ټول كال به د همدا حال وي،د افغانستان په يوه لرې پرته سرحدې سيمه كې لمر خپلې زرينې وړانګې يه شنو پټيو،له ګورګورو ډک دنګو غرونو،او له خټو جوړ خړو كورونو وشيندلې.

كليوالو خپل سهار په خوشالۍ پيل كړ،چا پټي اوبول ،چا ونې كينولې، او ځينې كسان په نوى جوړيدونكې جومات كې په كار لګيا و،زه نن اوزګار وم له سهاره مي طبيعت ښه نه و، ورځ راباندې نه تیریده،نيمه ورځ راباندي په ډيره سختى تيره شوه،د نورو كالونو برخلاف دا ېيڅووم كال و چې پدې ورځ مې ميله نه وه كړې،ورځ تيريده زه هم اخير د مازديګر درى نيمي بجي د پټيو په طرف روان شوم،لا رسيدلى نه وم چې درز شو،سمدستې مې پروت وکړ او زمونږ له كلي سره نږدي امريكايئ هډي څخه خړي لوخړي پورته شوى.

طالبانو له کورونو څخه په پوځې هډه د هاوان مرمۍ وداغله او وتښتیدل،خو له دوی وروسته ناټو او اردو واله سخته جګره پيل کړه،د نارنجك،هاوان ،فيكه،راكټ او ډول ډول ميزايلو بې شماره ګولي ناټو په كلې وراولي،جنګ شيبه په شيبه سختيده او هوايئ قواو هم خپل راكټ ويشتل په پټو او كروندو كي ماشومان ځوانان ښځي او سپين ږيري د مرګ په خوله كي پراته و ،جنګ لا نيم ساعت نه وتلي چې په بېړه مې په موبايل كې جيبې قران كريم خلاص کړ ياسين شريف او نور سورتونه مې لس لسځلي ولوستل او خداى ته مي دعا وکړه چې ياالله ته ټول مسلمنان په خپل امان کې وساته زما خو هيڅ وس نشته…..

د درندو او سپکو وسلو سلګونه او زرګونه ګولې به کلې وریدې،خو اخیرجنګ تر دوه ساعته وروسته غلى شو،زه هم د نورو كسانو سره د نړيدلو كورونو يه طرف په بيړه ورغلم د كلي لوى جومات په څنډو‌ بې شماره هاوان لږيدلې و خو جومات خداى پاك ترې ساتلى و ،په داسې حال کې چې جومات ټول له مزدورانو ډک و،خو خدای ټول روغ رمت ساتلې و،له جومات ور اخوا په يو كور وننوتم كور كې د ماشومانو او تور سرو كريغي او وير اخيري حد ته رسيدلى و.

د کور برنډه او دوه کوټې ناستې وې او خړې لوخړې ترې ختې . كور نيم له منځه تللى و خو ماشومان او ښځي د كوټي په ړنګو كونجونو كې خداى پاك په سره اور كې ساتلي و،ددي څخه وراخوا دوه نور كورونه هم لږيدلي و خو يوازي څو كسان سرسري ټپيان و نوره خداى تري ساتلي و،د کورونو دیوالونه چې ما وکتل نو داسې ځای مې پکې پیدا نکړ چې مرمۍ پرې لږېدلې نه وې
،خدای ج د تولو مسلمانانو ته باقې خیر کړې.

طالبان په پښتنو داسې حال راوړی دی چې، دا یوه ورځ یې هم خوشهالی ته ورپرینښوده!

دوی ښه پوهیږي چې مونږ ټول دې نوي کال نوې ورځ لمانځو.  دوی دا یوه  دې خوشالی ورځ هم مونمږ ته نه پریږدي؟ زمونږ ورځې یې را تورې شپې کړې!

طـــــالــــــــــــــــــــــــــــــــبه که جنګیږي، نو بیا نر غوندې وجنګیږه!!!

تښته مه!!!  بې ګناه پښتانه شاه ته مه پریږده!!!

جنګونه مو غرو ته یوسه چې بې ګناه پښتانه په کښې ووژل نشي!!!

زمونږ کورونه مو برباد کړل او زمونږ خوشالی مو رانه واخسته!!!

پښتونه!!!


په لوی مارکیټ کې  د هټیو مخې ته د ډول ډول مرغانو پنجرې ایښې وي،د ننه پکې رنګارنګ چرګان او نور مرغان ښکارېدل،ځینې غټ،څه ډنګر ، ځینې مریض او مړاوې ښکارېدل،

دوکانداران یې مخې ته ناست ؤ،چې کله به هم کوم اخیستونکی راغئ، نو پنجره کې به ېې د پلورنکې په ملتیا چرګان خوښول،په لږه شیبه کې به سړې چرګ په نښه کړ او دوکاندار به پسې لاس ورننویست، چرګبه شور جوړ کړ ،یو خوا بلې خوا به یې وزرونه ووهل ،خو اخېر به یې پښه تړلی ژوندی اخیستونکې ته ورکړ، او یا به یې د چرګانو مخې ته پرې چاړه راتیره،له چرګ به وینو دارې وهلې او پنجره کې ایسارو مرغانو به په مړاوې انداز ورکتل،دوی لیدل چې شېبه به شېبه یې ملګرې حلالېږ،ې او د دوی وار هم را روان دی،خو د ټولو حواس مړاوی شوې و،که له وسه یې څه پوره هم وو خو نه ېې شوای کولای،

یوازې هغه مرغه به د خلاصون هڅې کولې چې د چړې لاندې به پروت ؤ،نورو به ری هم پرې نه واهه،

دا د خوست ښار د چرګانو کوڅې حال دی،ما چې نن دوی ولیدل، نو پښتانه هم همداسې راته ښکاره شول،هره ورځ نوې خبرونه د پښتون په وژلو جوړیږې،
په دې تیرو ورځو کې څومره پښتانه له منځه لاړل؟

ننګرهار کې په واده برید ۹ تنه وژلې،

بله خوا پښتونخوا کې غبرګو ځانمرګو سل پښتانه ووژل
پکتیا کې پر ساختمانې شرکت د وسلوالو  برید ۴۰ کارګران وژلې،
پیښور بمې چاودنو ۴۰ پښتانه ووژل
دا خو لا زاړه خبرونه و،هره ورځ ځانمرګی پښتون وژنې.

هره ورځ پښتون میشته سیمو کې پښتون مشر ،کشر د طالب،القایده او جاسوس او نورو نومونو وژل کیږې او نور به هم ووژل شې،
له کورونو او جوماتونو نیولې تر پوهنتون او مکتب پورې بمبارې او چاودنې کیږې،خو چې کله پکې بې ګناه پښتانه ووژل شي،یو طرف ترې بخښنه غواړې او بله ډله ورته  اجر غوښتنه کوي،
خو پښتانه اوس داسې حالت ته رارسیدلې چې، په کور یې نه وي راغلې  له خولې غږ نه اوباسې،

د دسيسو او توطئو خبرې زموږ د شنونکو ، کارپوهانو او حتی عوامو په خبرو کې اوريدل کيږي . يو زيات شمیر خلک اوس هم په مجلسونو کې دا خبره مطرح کوي ، چې انګريز زموږ تاريخي دښمن دی او غواړي دا غچ له موږ نه واخلي چې دوی ته مو څو ځلې تاريخي ماتې ورکړي وې او دا افغانان وو ، چې د دوی غرور  يې په نړۍ کې مات کړی . زموږ ځينې افغانان هم په دې هکله  لږ افراط کوي او هرې پیښه کې ،که د کلي او سيمې په کچه  هم وي په هغه کې د انګريزانو ﻻس ويني .

د دغو خبرو د سموالي او ناسموالي په هکله مطلق حکم کول مشکل دي لیکن د بريتانيا د پخواني لومړي وزير چرچهیل دا خبره مې په ذهن کې وګرځيده چې ويلي يې وو: „ موږ داييمي دوستان او داييمي دښمنان نه لرو خو موږ داييمي ګټې لرو „ .نن سبا پښتون له انګرېز او عرب زیات په خپله پښتنو وژلئ

همدا پښتون دی چې ځانمرګی برید کوي،ښوونځی سوځوې،د پښتون په جاسوسۍ بې ګناه خلکو باندې بمبار کیږې،مشران دوی وژنې او……

د پښتنو شعور اوس مړاوی شوی دی، دوی اوس د چرګانو په ډول پنجره کې ژوند کوې،که کوم پښتون دې اغیار پکار شي نو د غدارو لیډرانو په واسطه همدا پښتون لاس تړلی یا حلال ور کوې ،خو تر اوسه یو پښتون هم ما ونه لید، چې اوس وخت کې ېې د وحشت په ضد بغاوت کړی وي،یا به د ولس شعور  مړاوی شوی یا حالاتو دې ځای ته راوستلې چې له خولې غږ نه شي باسلی،که په چا راشې نو صرف هغه ژاړې او ولس ورته مړاوې مړاوې ګورې،

که مونږ یو نه شو،د وحشت په حلاف بغاوت ونه کړو،د ظلم مخه ونه نیسو نو یو به یو به وژل کیږو او داسې ورځ به راځې چې دپښتون په نوم به هیڅ څوک هم نه وي،
نوره راویښ شئ،نیکونو مو ویاړونه ګټلې ،لږ مټو کې همت پیدا کړئ چې سبا خو لمسیانو ته څه ویاړونه ورپرېږدو!!!!!!!!!!!!!!!

پښتو متلونه


چرته چې ډب وي هلته ادب وي

مرګ د اوبو وار دی نن په ما ، سبا په تا.

په منډه نه ده په ټنده ده

چې لاړ شي تر بلخه در سره ده خپله برخه

اصل له خطا نشته کم اصل نه وفا نشته

الوتي مارغه په لاس نه راځي

که توفیق د اتفاق پښتانه مو ممي ـ  زوړ خوشال به دوباره شي په دا ځوان

یو خوا ډاګ دی بلخوا پړانګ دی

کوهي مه کنه د بل سړي په لار کښې ـ چرې ستا به د کوهی په غاړه لارشي

قول و بول په ژوندون نشې نورولئ ـ ځکه ځان په قول وژني پښتانه

که سل کاله ژوندی یی، اخیر دګوربنده یی.

ژوند د مرګ انتظار دی.

په ښو کې تلوار په بدو کې ځنډ.

نرمه غاړه چاړه هم نه پرې کوي.

خبل عمل د لارې مل.

صبر سرور دی.

صبر تریخ دی خومیوه یې خوږه ده.

بیړه شیطان کوله پرې لعنت شو.

په توره شپه کې هر څوک ډاریږي، خو څوک حال وایي او څوک یې نه وایي.

که اسمان دې زمري په خوله کې ورږړی ، د زمري په خوله کې مه پریږده همت. (خوشالخان خټک)

چیرته چې صبر نشته ، هلته پوهه هم نشته.

ښه وکړه، دریاب ته یې واچوه.

چې ښه کوې بد به نه وینې.

پاک اوسه ، بې باک اوسه.

چیرته چې مصلحت وي ، هلته عدالت وي.

که په پردۍ ځمکه نیالګي کینوې ، د تبر غږ به واورې.

د عدالت په وخت کې ګیدړه او زمری یو ځای اوبه څښي.

بې هنره سړی د بې میوې ونې په شان دی.

ښځه د نر جامه ده.

امیر چې ظلمکار وي، اوربل په ټول دیار وي.

زړه ور یوه ورځ مري او بې زړه هره ورځ.

سردې لاړشي، مال دې لاړشي، پت دې نه ځي.

د تورې زخم جوړیږي، خو دژبې زخم نه جوړیږي.

د بدې خبرې سل کاله عمر وي.

انسان په خبرو او څاروی په رسۍ وتړه.

په توره هر څوک مري سړی هغه دی چی په خبرو مړ شي.

ژبه د عقل تله ده.

د ژبې اعتبار دقوم اعتبار دی.

تیزه ژبه دلال ته پکار ده.

څوک چې اوږده ژبه لري عقل یی کم وي.

چې زهر جنه ژبه لري، زهر به وڅکي.

ژبه د زړه کونجي ده.

د پښې د خوییدو چاره کیږي، خو د ژبې د ښوییدو چاره نه کیږي.

د هر سړي عزت په خپل لاس کې دی.

ریښتیا زوال نه لري.

ریښتیا ویل ترخه دی، خو میوه یې خوږه ده.

په تهمت رنګ شوې جامې په صابون نه سپینیږي.

ریښتیا خبره تیږه ماتوي، او ورانه خبره سر ماتوي.

د ریښتینې انسان ملګری خدای دی.

درواغجن دخدای دښمن دی

د درواغو منزل لنډ وي.

د لمر له وړانګو، او د خان له خندا وویریږه.

کبر د ناپوهۍ اوهلاکت پیل دی.

کبر داسې خواږه دي، چې اخر خپل زبیښونکې وژني.

پردی جنګ نیم اختر دی.

توره سره ښه ده ، خو نه د ورور په وینو.

په جنګ کې یو ګام د سلو کالو لار ده.

د جنګ میدان په پښو نه وهل کیږي.

روغ صحت نیمه بادشاهي ده

طالبان چې ملا محمد عمر ته په غوږ وي، ژوند به داسې وي!


اوله برخه

دوهمه برخه

دریمه برخه

Previous Older Entries

%d bloggers like this: